کعب بن زُہیرؓ کے لیے امان
نبی ٔ امن و آشتیﷺ نے کعب بن زہیر جیسے واجب القتل شخص کو بھی امان دی اور اُسے معاف کردیا گیا۔یہ عرب کا مشہور شاعر تھا اور مکے کا باشندہ تھا۔ اس کی شاعری اسلام دشمنی کے لیے وقف تھی۔ وہ نبی کریمﷺ کے خلاف ہجو بھی کہتا تھا۔فتح مکہ کے موقع پر نبی کریمﷺ نے جن چار اسلام دشمنوں کی گردن زنی (گردن اڑانے)کا حکم دیا تھا اُن میں کعب بن زہیر بھی شامل تھا۔

کعب چونکہ اپنے قتل کا اعلان سن چکا تھا، اس لیے اپنے بھائی بجیر سمیت مکہ سے بھاگ کر ایرق الغراف کے مقام پر پناہ گزین ہوگیا۔پھر بجیر حالات کا پتہ چلانے مکہ مکرمہ واپس پہنچا تو اس نے کعب کو پیغام بھیجا کہ جو لوگ توبہ کرکے معافی کے طلبگار ہوئے تھے، رحمۃ للعالمینﷺ نے اُن کی جاں بخشی کردی تھی۔ اس کے بعد بجیر مدینے چلا گیا اور وہاں جاکر نبی کریمﷺ سے ملا اور مسلمان ہوگیا۔اگرچہ کعب کو اپنے بھائی کا اسلام لانا ناگوار گزرا لیکن اس کے منظوم دعوتی پیغام نے کعب کے دل پر بہت اثر کیا اور حق کی کشش نے حُب رسول کا جذبہ پیدا کردیا۔ اسی کیفیت میں قصیدہ ’’بَانَتْ سُعَادٌ‘‘ لکھا اور مدینے روانہ ہوگیا۔ وہ وہاں ایک دوست کے گھر ٹھہرا۔ پھر علی الصبح مسجد نبویﷺ میں پہنچا۔ نمازِ فجر کے بعد نبی کریمﷺ کے دست مبارک کو ادب سے تھام لیا۔
اجنبی بن کر کہنے لگا:’’یارسول اللہﷺ!اگر کعب بن زہیر امان کا طالب ہو۔ اپنے خطائوں پر نادم ہوتو کیا آپﷺ اُسے معاف کردیں گے؟‘‘حضورﷺ نے فرمایا:’’ہاں، کیوں نہیں۔‘‘پھر کعب نے سرجھکا کر عرض کیا کہ وہ خطا کار میں ہی ہوں۔یہ سن کر ایک انصاری بولا:’’یا رسول اللہﷺ! اجازت دیں تو میں خدا کے اس دشمن کی گردن اُڑا دوں۔‘‘ حضورﷺ نے فرمایا:’’تم اس سے دُور رہو۔ یہ اپنے گناہوں پر شرمسار ہے اور توبہ کے ساتھ معافی چاہتا ہے‘‘۔پھر آپﷺ نے اُسے معاف فرمادیا اور اس نے اسلام قبول کرلیا۔ اس کے بعد کعب بن زہیر نے اپنا مشہور قصیدہ ’’بَانَتْ سُعَادُ‘‘ پڑھا۔ اس قصیدے میں نبی کریمﷺ کی شان بیان کی گئی تھی۔ جس سے خوش ہوکر آپﷺ نے اُسے اپنی یمنی دھاری دار چادر بھی عنایت فرما دی تھی۔ (سیرت ابن ہشام، البدایہ والنھایہ لابن کثیر، سیرت المصطفیٰ ازمولانا محمد ادریس کاندھلوی)۔ یوں پیغمبر اسلام ﷺ نے ایک ایسے غیرمسلم جو کہ واجب القتل تھا سے حسن سلوک فرماتے ہوئےاس کی جاں بخشی فرمادی۔